Laguntza:Estekak (eu)
Gehienetan, artikulu baten barruan aipamen asko egiten dira: Soraluzeko beste pertsona, toki, eraikin, dokumentu...
Ez du merezi informazio guzti hau bertan kopiatzerik: Sorapedian horri buruz artikulua balego, nahikoa litzateke esteka bat jartzen. Gero, irakurleak bertan sakatu eta aipatutako artikulura salto egingo du.
Hau oso komenigarria da, hainbat arrazoiengatik:
- Artikulak aberasten ditu. Artikuluak mamitsuak izatea komeni da... pasatu barik! beste artikuluen aipamena egiten badugu, artikulu hauen 'mamia' gure artikulutik eskura jartzen ari gara eta, beraz, gure artikulua aberastuko dugu modu errezean.
- Lan gutxiago egiteko. Informazioa eguneratzeko, nahikoa izaten da artikulu bakarra mantendu. Aipamena egiten dioten artikuluak eguneratutako bertsioa erabiliko dute, ez da ezer gehiago egin behar.
- Irakurleen arreta mantendu. Behin gure artikulura irakurlea sartuta, irakurri eta gero aipamena (esteka) erabil dezake Sorapediaren beste artikulua irakurteko, eta hemendik beste bat, eta beste bat... Modu honetan Soraluzeri buruz gehiago ikasiko du.
Adi! Helburua ez da artikulu asko eta laburrak izatea, bestela irakurlea aspertuko genuke. Baina artikulua idazterakoan kontutan hartu beharko dugu bi gauza:
- Sorapediaren zein beste artikulu aipatu daitezke bertan.
- Kanpoko artikulurik aipatzeak merezi duen.
Sorapedia barruan
Gorago esan dugunez, aipamen gehienak Sorapediako beste artikuluetara egingo ditugu.
Esteka sartzeko hiru urrats egin behar ditugu:
- Esteka lotu nahi diogun testua saguaz aukeratu
- goiko menua esteka sakatu (hiru begiko katea) eta
- Sorapediak erakusten duen menuan, goiko leroan artikuluaren izena sartu, (eu) edo (es) edo… ahaztu barik!
Oharra: Euskararen sintaxia dela, eta Sorapediaren izenak direla, esteka sartu nahi diogun testua eta artikuluaren izena ez dira bat etorriko. Esateko, demaigun ...Obe baserriko aurrekaldea... esaldian Obe baserriaren aipamena egin nahi dugula; lehenik eta behin lotzeko testua aukeratuko dugu (izan Obe, Obe baserri, obe baserriko edo Obe baserriko aurrekaldea) eta, esteka sartzerakoan, testu horri Obe baserria (eu) artikulua lotu beharko diogu.
Sorapediatik kanpo
Gorago esan dugunez, testu bati esteka gehitu nahi badiozu, testua aukeratu, goiko menua esteka sakatu (hiru begiko katea) eta, erakusten duen menuan, goiko zatian esteka osoa sartu.
